रिकामी पोरं..

रिकाम्या वेळी हातपाय मोडतो
लागली भूक की चार भाकरी तोडतो 
तुम्ही म्हणाल साले काय लेकाचे ढोरं
असेच हाव आम्ही रिकामी पोरं

ठिगळे असली तरी शान लय मारतो
मागं पुढं पाहत न्हायी राजकारण करतो
भित न्हाय कोणाले डायरेकच भिडतो
सोतासाठी न्हाय तर लोकासाठी लढतो

समाजसेवा करण्याचा लय भारी छंद
जरी असन आमची बुद्धी थोडी मंद
खिशात नाही दमडी दानवीर बनतो
मेहनतीची कमाई मात्र धाब्यावर मांडतो

हातात न्हाय पोराच्या नोकरी न धंदा
तरीही तयारच भेटन लग्नाला बंदा
घरच्यांना असते नेहमीच लगीन घाई
माय म्हणते बाळा पाहिजे सूनबाई

बैलगाड्या गेल्या अन टू व्हीलर आल्या
पाहून आमचा थाट म्हणते शेजारचा माल्या
पाय न्हाय पुरत अन शेफारला का साल्या
मंग डोकं आमचं सरकते ऐकुनी ह्या गाल्या

बस झालं माल्या लय ऐकून घेतो
लेकराला माह्या आता फोर व्हीलर देतो
मी झालो बाप अन कोणाला भितो
देशी सोडून आता इंगलीशचं पितो

तुम्ही म्हणाल साले काय लेकाचे ढोरं
असेच हाव आम्ही रिकामी पोरं

- रानमोती काव्यसंग्रहातून

थोडं सुचलं होतं

मी नव्हते भानावर
शब्द पडताच कानावर
इतरांनीच घेतले मनावर
मग काय सुरु झाली
चर्चा माझ्या काव्यावर
बऱ्याच आल्या प्रतिक्रिया
सुरु होती शस्त्रक्रिया
कुणी बोलले
छान आहे काव्य
तर कुणी बोलले
हे काय अवाढव्य
कुणी म्हणाले
शब्द जुळतात
पण अर्थ लागत नाही
एक दोन कळतात
बाकी वळत नाही
मी मात्र शांत
कुठलीच नव्हती भ्रांत
हळू आवाजात म्हणाले
थोडं सुचलं होतं
म्हणुन रचलं होतं

- रानमोती / Ranmoti

दगड मारला

कोणी वेडयाने मना तुला दगड मारला
डोळयाच्या कडेतुनी अश्रू वाहला
आनंद सोडून गुलामीत रमला
कुणासाठी जग सोडून एकटाच उरला
कोणी वेडयाने मना तुला दगड मारला 

धडधडत्या हृद्यात श्वास कोंडला
अपमानाचा शिक्का जणू नशिबी गोंदला
जीव ज्याने तोडला त्यालाच मानला
साचलेल्या दु:खाला पाझर फुटला
कोणी वेडयाने मना तुला दगड मारला

अनमोल जीव आता बेमोल जाहला
स्वार्थाचा घाव असा किती सहला
विश्वासाचा धागा जागीच तुटला
नात्याचा गोडवा नावापुरता उरला 

कोणी वेडयाने मना तुला दगड मारला 

- रानमोती / Ranmoti

तुझमे समाना है..!

बेरूख जिंदगी से
खुदको संवारना है
पूरी शिद्दत से
तुझमे समाना है

गमोके दायरे से
अब निकलना है
ईश्कके रास्ते से
तुझमे समाना है

तेरे अपनो से
तुझे चूराना है
मेरी किस्मत से
तुझमे समाना है

शब्दोके तिर से
दिलको भेदना है
आखोकी बांतो से
तुझमे समाना है

सांसोकी आहट से
तुझे मिलाना है
अपनी परछाई से
तुझमे समाना है

रूंहकी गुप्तगू से
रास रचाना है
छूनेकी आस से
तुझमे समाना है

तेरी समझ से
खुदको बनाना है
अपनी ख्वाईशो से
तुझमे समाना है

पूरी शिद्दत से
तुझको पाना है
प्यारके ईजहार से
तुझमे समाना है 

- रानमोती / Ranmoti

त्यासी आज वंदन

नसे तो पावन 

वृत्ती ज्याची रावण

सुखी करतो जनजन

त्यासी आज वंदन 

 

इहलोकी कर्म जाणतो 

सेवार्थ नेम साधितो 

खऱ्या मानवा नमतो

त्यासी आज वंदन 

द्वेष क्लिष्टा त्यागून 

परमार्थ पाहून 

सर्वांसी आपले करतो

त्यासी आज वंदन 

भगवंता तोचि आवडे

ज्यासी दुर्गुण वावडे 

अनाठाई टाळतो 

त्यासी आज वंदन 

- रानमोती / Ranmoti

******************

बघा कशी विज धावली..!

बघा कशी विज धावली...

पाण्याची घेऊन शक्ती
जनरेटरची लावून उक्ती
ताराच्या जाळ्यात व्यापली
आधुनिक मीटरात मापली
बघा कशी विज धावली
माझ्या घराच्या दिव्याची माउली

टर्बाईनला देऊन वाफ
कोळसा जणू झालाया बाप
उंच उंच टॉवरला गोवली
येऊन सबस्टेशनला चालली
बघा कशी विज धावली
माझ्या घराच्या दिव्याची माउली

जागोजागी रोवून खांब
गेलीया गावोगावी लांब
धावून हळूहळू दमली
जाऊन डिपीवर रमली
बघा कशी विज धावली
माझ्या घराच्या दिव्याची माउली

तपासून सारे आरोग्य
झाली ती वापरण्या योग्य
चोरट्याने मधात हेरली
टाकून आकुडे चोरली
बघा कशी विज धावली
माझ्या घराच्या दिव्याची माउली

झालीया जगाचा प्राण
वापराचे ठेऊया भान
भरुया वेळेवर बिल
थकबाकी ठेवूया निल
बघा कशी विज धावली
माझ्या घराच्या दिव्याची माउली

- राणी अमोल मोरे

सारांश

ग्राम पंचायती आणि सरकारी शाळांच्या
भिंतीवर सुविचारांची रंगोटी झाली
हे सारं पाहून आम्हाला वाटलं
देश सुसंस्कृत आणि सुशिक्षित झाला

वकिलीच्या अनेकांना पदव्या मिळाल्या
स्वतंत्र न्याय प्रणालीचा स्विकार झाला
हे सारं पाहून आम्हाला वाटलं
देश न्यायप्रिय आणि अन्यायमुक्त झाला

कोट्यावधींची बजेट सादर झाली
योजनांचा सर्वत्र थर साचू लागला
हे सारं पाहून आम्हाला वाटलं
देश समृद्ध आणि सधन झाला

पर्यावरण कार्यक्रमाला हजेऱ्या वाढल्या
‘झाडे लावा, झाडे जगवा’ जप सुरु झाला
हे सारं पाहून आम्हाला वाटलं
देश हिरवागार आणि प्रदुषणमुक्त झाला

प्रसारमाध्यमे आणि वृत्तपत्रांना चालना दिली
जाहिरातींचा सपाटा भलताच वाढला
हे सारं पाहून आम्हाला वाटलं
देश सामान्य माणसाचा आवाज झाला

सर्वच धर्मांना आणि भाषांना आश्रय दिला
साऱ्या सणाला सुट्ट्याही मिळाल्या
हे सारं पाहून आम्हाला वाटलं
देश धर्मनिरपेक्ष आणि ऐकतावादी झाला

सिनेमागृहात राष्ट्रगीत अनिवार्य झाले
"वन्दे मातरम्" नारेही गुंजू लागले
हे सारं पाहून आम्हाला वाटलं
देश आता भक्तीमय आणि देशप्रेमी झाला

रानमोती काव्यसंग्रहातून.....